Бокс – көслөләр спорты

Бөгөнгө көндә “Сыңғыз” бокс клубында 120нән ашыу бала шөғөлләнә. Улар араһында 7-16 йәшлек ҡыҙҙар-егеттәр бар. “Сыңғыз” клубы даны районда ғына түгел, республика һәм Рәсәй кимәлендә дә киң таралған. Егеттәр Мәскәү, Санкт-Петербург ҡалаларында үткән ярыштарҙа чемпион исемен яулай.
“Сыңғыз” бокс клубына яҡты һәм иркен зал бирелде – спортсылар Башҡортостан аграр-технология колледжының райондағы филиалы залында шөғөлләнә. Беҙгә егеттәрҙең бөтә шарттары булған иркен залда үткәрелгән күнекмәһен күҙәтеү мөмкинлеге асылды. Чемпион егеттәр менән бер аҙ әңғәмәләшеп тә алдыҡ. Данил Йосопов бокс менән ете йылдан ашыу шөғөлләнә, район кимәлендә уҙғарылған ярыштарҙа дүрт тапҡыр чемпион исемен яулай. Айнур Мостафин: “Мин “Сыңғыз” клубына дүртенсе йыл киләм. Рингта көс һынашыуға нигеҙләнгән спорт төрө миңә өҫтәмә көс бирә”, – ти ул.
“Беҙҙең клуб егеттәренә яратҡан спорт төрө менән шөғөлләнергә мөмкинлек асҡан өсөн муниципаль район хакимиәте етәкселегенә, район хакимиәтенең мәғәриф бүлегенә һәм бөтә ата-әсәләргә рәхмәтлемен”, – ти Илгиҙ Ғәбделхәй улы.
Күптән түгел Татарстан Республикаһының Аҙнаҡай ҡалаһындағы «Сатыртау - Арена» универсаль спорт залында Халыҡ-ара категориялы хөкемдар Зиннур Зәйнетдин улы Әбдрәшитов истәлегенә арналған бокс буйынса IV турнир уҙғарылды. Ярышты асыу тантанаһында Аҙнаҡай муниципаль районы хакимиәте башлығы урынбаҫары Айдар Фәндәс улы Хәлиуллин, бокс буйынса СССР-ҙың халыҡ-ара класслы спорт мастеры Фоат Әғрәф улы Ғатин, бокс буйынса Рәсәй халыҡ-ара класслы спорт мастеры Нияз Нурғәли улы Фәйҙуллин, Зиннур Зәйнетдин улы Әбдрәшитовтың ғүмер юлдашы Мөсфирә Ғабдулла ҡыҙы һәм туғандары ҡатнашты.
Бәйгелә бөтәһе 14 команда һәм 150 спортсы көс һынашты. Улар Татарстандың Аҙнаҡай, Йәлил, Норлат, Бөгөлмә, Кама Аланы, Әлмәт, Ютаҙы, Ҡарабаш, Алабуға һәм Лениногорск ҡалаһынан, Башҡортостандың Баҡалы һәм Саҡмағош райондарынан, Туймаҙы районы Ҡандра ҡасабаһынан килгән ине.
Был дәрәжәле сарала районыбыҙҙың Илгиҙ Ғәбделхәй улы Ибраһимов етәкселегендәге “Сыңғыз” бокс клубы спортсылары ҡатнашып, район данын яҡланы.
Үҙ ауырлыҡ категорияларында Саҡмағоштан Әмир Хәбиров, Раян Исламов (беренсе урын), Тимур Хәкимов, Самир Фазлыев, Руслан Ҡадиров, Әмин Баһауетдинов (икенсе урын), Наил Халиҡов, Радмир Хәбибшин (өсөнсө урын) еңеүле урындар яуланы.Турнир еңеүселәре һәм призерҙары Грамоталар, миҙалдар, кубоктар һәм аҡсалата премиялар менән бүләкләнделәр.
Илгиҙ Ғәбделхәй улы ярыштарға ҡатнашыуҙа ярҙам иткән ата-әсәләр Илнур Хәкимов, Илсур Халиҡов, Лилиә Баһауетдинова, Регина Хәбибшина, Регина һәм Ринат Хәбировтарҙы рәхмәт һүҙҙәре менән телгә алды.
Районыбыҙҙың “Сыңғыз” бокс клубы ярыштарҙа йылдан-йыл уңыш яулап, юғары дәрәжәләргә ирешә. Киләсәктә дә уларға уңыштар теләп ҡалабыҙ! Афарин!
Башҡортостан Республикаһында спорт әүҙем үҫештә, районыбыҙҙа бокс менән шөғөлләнеү өсөн мөмкинлекләр бар. Әлеге спорт төрө үҫеп килеүсе быуында сәләмәт ғәҙәттәр формалаштырырға ярҙам итә.
Өҫтәп шуны ла әйтергә кәрәк: 27 ноябрҙән 7 декабргә ҡәҙәр Өфөләге көрәш һарайында ҡатын-ҡыҙҙар араһында бокс буйынса Рәсәй чемпионаты уҙа. Турнир көндәрендә төбәк башҡалаһына илебеҙ боксы легендалары килер тип көтөлә. Улар араһында – бокс буйынса донъя чемпиондары, Олимпия уйындары призерҙары һәм еңеүселәре Софья Очигава, Егор Мехонцев, арҙаҡлы спортсылар Саадат Далгатова, Светлана Андреева, Алексей Тишенко, Ирина Серебреникова, Эдуард Абзалимов һәм Әхмәдхан Адилов.
“Донъя боксы йондоҙҙарының Өфөгә килеүе – быуындар араһында сираттағы күпер төҙөү мөмкинлеге ул, – ти был хаҡта Башҡортостан Хөкүмәте вице-премьеры – спорт министры Руслан Хәбибов. – Беҙ уларҙың үрнәге беҙҙең спортсыларыбыҙҙы ла яңы ҡаҙаныштарға илһамландырыр тип ышанабыҙ”.
Турнир барышында атаҡлы спортсыларҙың медицина үҙәктәрендә дауаланыусы балалар һәм госпиталдәрҙә шифаланыусы махсус операцияла ҡатнашҡан яугирҙәр менән осрашыуҙары ойоштороласаҡ. Спорт йондоҙҙары оҫталыҡ сәғәттәре һәм автограф-сессиялар үткәрәсәк, үҙ ҡаҙаныштары тарихтары менән дә уртаҡлашасаҡ.