«Тайфун»ға яңы уңыштар

Мотоцикл спортында иң популяр төрҙәренең берһе махсус мотоциклдарҙа юлһыҙ ерҙә уҙышыуҙан тора. Һауа-десант ғәскәрҙәре көнөнә бағышланған ярыштарҙа ҡатнашыу өсөн Стәрлетамаҡ, Салауат, Өфө, Октябрьск ҡалаларынан һәм беҙҙең райондан туҡһандан артыҡ спортсы йыйылды. Уларҙың иң йәшенә – биш, иң өлкәненә алтмыш йәш тирәһе ине. Текә бейеклектәрҙе яулағанда һәм баш әйләндергес соҡорҙарҙы үткәндә мотоциклсыларға техниканы ғына түгел, үҙҙәренең хис-тойғоларын да контролдә тотоу еңел булмағандыр, моғайын. Спорт байрамы бүләкләү тантанаһы менән тамамланды. Еңеүселәрҙе хөрмәтләргә һәм бүләктәр тапшырырға муниципаль район хакимиәте башлығы Марат Латипов килде. –Иң әҙерлекле, тиз һәм етеҙ спортсыларҙы бүләкләйбеҙ. Бөгөн кубок һәм миҙалдар барыһына ла эләкмәһә лә, район спортсыларынан киләһе ярыштарҙа юғары һөҙөмтәләр көтәбеҙ, – тине ул. –Районда мотоцикл спорты яҡшы үҫеш алды. Даими күнекмәләр, тренерҙың һәм йәш мотоциклсыларҙың яуаплы мөнәсәбәте «Тайфун» командаһына республикала матур ҡаҙаныштарға ирешергә мөмкинлек бирә, – тип билдәләне йәмәғәтселек фекере лидеры Айвар Танғатаров. –Республиканың һәр кешеһе – эре ҡалала йәки йыраҡ ауылда йәшәүсе уҡыусы, пенсионер, һәүәҫкәр йәиһә разряд эйәһе булһынмы ул – спорт менән шөғөлләнә алһын өсөн барлыҡ шарттарҙы тыуҙырыу тураһында хыялланам, – тигәйне Радий Хәбиров. Айгөл Вәлиева. Автор фотосы. Фото: Мотокросс. Август.