Юбилей турниры

Бишенсе юбилей турнирында төп бүләк өсөн майҙанда алты команда ярышты.

Турнир бик көсөргәнешле үтте, сөнки һәр команданың да уңышҡа ирешәһе килде. Уның барышында еңеү шатлығы һәм еңелеү әсеһе, уйындан сығарылыу, ташламаһыҙ көрәш, йәрәхәтләнеүҙәр ҙә һәм иң мөһиме – спортсыларҙың матур уйыны булды.

Көн буйы уйын барышында еңеү ниәтләгән командалар маҡсаттарына ирешергә тырышты. Көндәштәренең ҡапҡаларына һөжүм тынып торманы. Был иҫәпте күбәйтте һәм үҙ футболсыларын хуплап тороусы йәнатарҙарға дәрт өҫтәне. Осрашыуҙың һуңғы миҙгелдәренә ҡәҙәр командалар араһында еңеүгә көслө ынтылыш һаҡланды.

Уйын һөҙөмтәләре буйынса турнирҙа Илмир Хәбибуллин (Ауырғазы районы) – иң яҡшы судья, Денис Сазонов (Ауырғазы районы) – иң яҡшы ҡапҡасы, Илүс Ирғәлиев (Илек ауылы)  – ин яҡшы һаҡсы, Шамил Рәхимҡолов (Саҡмағош районы) – иң яҡшы һөжүм итеүсе, Илвир Гәрәйев (Сәйет ауылы) иң яҡшы уйынсы тип табылды. Иң өлкәне – Хәниф Әлимбәтов, иң кескенә уйынсы Әмир Нурумбетов (Дүртөйлө районы) булды.

–Бөтөн призерҙарҙы ла, бигрәк тә Ауырғазы районының татыу командаһын лайыҡлы еңеү менән ҡотлайбыҙ! Турнирҙа ҡатнашыр өсөн егеттәр йөҙ һикһән километр ара үткән. Ярышта төрлө йәштәге спортсылар ҡатнашты. Ин кескенәһенә – ун өс, иң өлкәненә етмеш йәш.

–Мәктәптәрҙә һәм башҡа уҡыу йорттарында спортты үҫтереү яҡлымын, – ти йәмәғәтселек фекере лидеры Венер Ғәлимов. – Йәштәрҙе әүҙем тормошҡа ылыҡтырыу өсөн барыһын да эшләргә кәрәк.