Еңеүселәребеҙҙе ҡотлайбыҙ!

Был көн истәлекле дата булараҡ ЮНЕСКО ойошмаһының Генераль конференцияһы тарафынан 1999 йылда иғлан ителә һәм 2000 йылдан билдәләнә башлай. Рәсәй – иң күп телдәрҙә һөйләшеүсе халыҡтар йәшәгән илдәрҙең береһе. Уларҙың 150һе – дәүләттә йәшәүселәр өсөн туған тел, 37-е дәүләт теле статусына эйә. Бындай үҙенсәлекле сифат – Ватаныбыҙҙың милли байлығы һәм ғорурлығы. Шул уҡ ваҡытта ул ҙур яуаплылыҡ та. Беренсе сиратта киләсәк быуындар алдындағы һәм ысын мәғәнәһендә ошо баһаһы булмаған рухи байлыҡты яҡлап һәм һаҡлап ҡалыу мөһимлегенә бәйле яуаплылыҡ. Сөнки тел ул – тарихи хәтер һаҡсыһы ла. Белеүебеҙсә, үҙ тарихын, үткәндәрен белмәгән халыҡтың киләсәге лә юҡ. Беҙ йәшәгән бөгөнгө ҡатмарлы, көнбайыш илдәренең Ватаныбыҙҙың данлы тарихын үҙҙәренә яйлаштырып күсереп яҙырға ынтылған осоронда тарихи хәтерҙе һаҡлап, киләсәк быуындарға тапшырыу айырыуса мөһим. 

  Өфө фән һәм технологиялар университеты бөгөнгө көндә илебеҙ тыныслығын һаҡлаусыларыбыҙға арналған “Беҙҙең көс – берҙәмлектә!” тигән темаға төбәк дистанцион конкурсын ойошторҙо. Был ижади бәйге патриотик йырҙар, шиғырҙар һәм бейеүҙәр башҡарыусыларҙы берләштерҙе. Был мәртәбәле конкурста Саҡмағош беренсе урта мәктәбенең 11-се “в” класы уҡыусыһы Азалина Хәбирова ла (етәксеһе – башҡорт теле һәм әҙәбиәте уҡытыусыһы Рәмзилә Рауил ҡыҙы Исламғәлиева) ҡатнашты. Азалина “Тасуири уҡыу” номинацияһында авторлыҡ шиғыры менән сығыш яһаны һәм I дәрәжә Дипломға, ә Рәмзилә Рауил ҡыҙы Рәхмәт хатына лайыҡ булды.  Афариндар! Еңеүселәребеҙҙе ысын күңелдән ҡотлайбыҙ!

Әйткәндәй, Башҡортостанда һәм беҙҙең Саҡмағош районы мәктәптәрендә һәм мәҙәниәт учреждениеларында  Туған тел көнө уңайынан күп төрлө саралар ойошторолдо. Байтаҡ йылдар дауам иткән күркәм традиция буйынса, Саҡмағош беренсе урта мәктәбендә ошо айҡанлы район күләмендәге шиғыр һөйләүселәр конкурсы үтте.