Спорт үҫеше – Башҡортостанда өҫтөнлөклө йүнәлештәрҙең береһе

Республикабыҙҙың Рәсәйҙең спортты үҫтереү буйынса иң яҡшы төбәге тип танылыуы һәммәбеҙ өсөн дә ҙур һөйөнөс. Башҡортостан Республикаһы спорт министры Руслан Таһир улы Хәбибов ошо сөйөнөслө хәбәр менән уртаҡлашып, быйылғы йылдың республикабыҙ спорт тормошо өсөн бик уңышлы булыуын, Милли спорт премияһының был өлкәлә иң мәртәбәле ҡаҙаныш булыуын билдәләне: – Спортсыларҙың, тренерҙарҙың һәм спорт өлкәһендәге белгестәрҙең профессиналь эшсәнлеген әүҙемләштереүгә йүнәлтелгән Милли спорт премияһы Рәсәй Федерацияһы Хөкүмәте тарафынан 2010 йылда булдырылған. Унда төбәктә үткәрелгән ярыштар, ҡатнашыусылар һәм ирекмәндәрҙең һаны, финанслау күләме баһалана. Шулай уҡ спорт сараларын пропагандалауҙың нәтижәлелеге дә мөһим роль уйнай. Башҡортостан Башлығы Радий Фәрит улы Хәбиров ҙур спорт ярыштары халыҡты, айырыуса балаларҙы спорт менән шөгөлләнеүгә йәлеп итә, спорт инфраструктураһын даими үҫтереүгә лә этәргес көс, тип исәпләй: “Ҙур спорт сараларын үткәреү – беҙҙең дәүләт бурысы. Беҙ ҡушылғанды ғына үтәмәй, йыш ҡына инициативаны үҙебеҙ күрһәтәбеҙ”. Белеүебеҙсә был ҡоро һүҙҙәр түгел: республикабыҙҙың башҡалаһында илебеҙҙең иң мәртәбәле “Рәсәй – спорт державаһы” халыҡ-ара форумын үткәреү ҙур уңышҡа килтерҙе, ул тәжрибә уртаҡлашыу, көнүҙәк мәсьәләләрҙе тикшереү һәм халыҡ-ара аренала Рәсәй спортының потенциалын күрһәтеү өсөн мәйҙансыҡ булды. Спорт министры шулай уҡ Башҡортостандың төрлө федераль проекттарда әүҙем ҡатнашыуын билдәләне: – Беҙ – Рәсәй Федерацияһының күп йүнәлештәр буйынса эксперименталь майҙансығы, республика халҡы өсөн, спорт менән шөғөлләнергә теләгән балаларыбыҙ өсөн мөһим проекттар эшләйбеҙ. Президент бик аныҡ маҡсат ҡуйды, спортта артыҡ коммерциялаштырыуҙы бетереү кәрәк. Руслан Хәбибов Башҡортостан Республикаһы Спорт министрылығының 2025 йылҙа пландары менән дә уртаҡлашты: – 2025 йыл Башҡортостан Республикаһы Башлығы тарафынан Махсус хәрби операцияла ҡатнашыусыларға һәм уларҙың ғаилә ағзаларына ярҙам йылы тип иғлан ителде. Һәм беҙҙең бурысыбыҙ – махсус хәрби операциянан ҡайтҡан яугирләребеҙҙе спорт һәм физкультура менән шөғөлләнеүгә йәлеп итеү. Спорт инфраструктураһын үҫтереүҙе һәм булған объекттарҙы яңыртыуҙы дауам итәсәкбеҙ. Республикала халыҡ-ара, Бөтә Рәсәй, төбәк спорт ярыштарын үткәреү дауам итәсәк. Был спортты популярлаштырыуға һәм төбәккә туристларны йәлеп итеүгә булышлыҡ итәсәк. Шулай уҡ Руслан Таһир улы спортсыларға социаль ярҙам арттырыласағын да билдәләп, спорт ветерандарына һәм йәш спортсыларҙа матди ярҙам программалары яңынан ҡараласаҡ, тине. Киләсәктә планнарҙа халыҡ-ара хеҙмәттәшлек географияһын киңәйтеү дә бар. Республика етәксеһе Радий Хәбиров Башҡортостанда спортты үҫтереүгә ҙур әһәмиәт бирә һәм төбәктең дәүләт сәйәсәтенең мөһим йүнәлеше спорт булыуын даими аҫһыҙыҙлай. Уның менән “тура бәйләнеш” барышында да ул халыҡтың спортты үҫтереү тураһындағы һорауҙарына яуап биреп, ауылда спортты үҫтереү республиканың өҫтөнлөклө йүнәлештәренең береһе булып ҡаласағын, республиканың Олимпия резервы училищеһын ойоштороу планлаштырылыуы һәм был проекттың әҙерләнеү стадияһында булыуы тураһында һөйләне. Башҡортостан Республикаһы Дәүләт Йыйылышы – Ҡоролтай депутаты, фехтование буйынса Рәсәй Федерацияһының атҡаҙанған спорт мастеры Аделина Заһиҙуллина Башҡортостанда спорт үҫешенә үҙенең баһаһын биреп, болай тине: – Быйыл спорт үҫешендә ҙур алға китеш булды: Башҡортостаныбыҙҙың башҡалаһында ла, республикала да күләмле спорт объекттары асылды, Президент Владимир Путин ҡатнашҡан “Рәсәй – спорт державаһы” форумы, Бөтә Рәсәй универсиадаһы үткәрелде. Был спортты үҫтереүгә, спортсыларға, тренерҙарға иғтибар республикала юғары кимәлдә булыуын күрһәтә. Радий Хәбировтың төптән уйланылған сәйәсәте нәтижәһендә Башҡортостан спортсылары өсөн генә түгел, ә төбәк халҡы өсөн дә ҙур үҙгәрештәр барлыҡҡа килде. Дөйөм алғанда, халыҡтың спортҡа ҡарашы уңай. Күмәк спорт та, студенттар спорты ла үҫешә. Беҙҙең Саҡмағош районында ла физик культураға һәм спорт менән шөғөлләнеүгә ҙур иғтибар бирелә. Был өлкәлә яуланған ҙур, дәрәҗәле ҡаҙаныштар быны асыҡ дәлилләй. Йәмәғәтселек фекере лидеры, Саҡмағош Балалар һәм йәшүҫмерҙәр спорт мәктәбе директоры урынбаҫары, тренер-уҡытыусы Алмаз Салауат улы Ильясов: – Районыбыҙҙа спорт йылдан-йыл үҫештә. Төрлө йәшләрҙәге райондаштарыбыҙ бер спорт сараларынан да ситтә ҡалмай, яҡшы ҡаҙаныштарға ирешә. Беҙҙә даими рәүештә төрлө спорт саралары үтә һәм үҙебеҙ дә башҡа төбәктәрҙә уҙған бихисап ярыштарҙа ҡатнашып торабыҙ. Беҙҙең Балалар һәм йәшүсмерҙәр спорт мәктәбе өсөн дә 2024 йыл юғары ҡаҙаныштарға, ҙур уңыштарға бай булды. Район, республика күләмендә уҙған спорт сараларында беҙ даими рәүештә уңыштарға өлгәшеп торабыҙ. 2024 йылға йомғаҡ яһағанда айырыуса хоккей, билбаулы көрәш, мас-рестлинг спорт төрҙәре буйынса уңыштарыбыҙҙы билдәләп үтәһе килә. “Алтын шайба” Бөтә Рәсәй йәш хоккейсылары ярыштарында беҙҙең спортсыларыбыҙ 2 урын яуланы. Краснодар ҡалаһында уҙған Рәсәй беренселегенә билбаулы көрәш буйынса Камилла Шәмсиева 3 урын алды. Егеттәр һәм ҡыҙҙар, юниорҙар һәм юниоркалар араһында мас-рестлинг буйынса Рәсәй беренселегендә Фаяз Ғәлиев 1 урынға лайыҡ булды, Сәмирхан Төхбәтуллин, Ғазим Йосопов 3 урын менән ҡайтты. Ә ошо уҡ спорт төрөндә Ҡырғыҙстан Республикаһының Бишкек ҡалаһында донъя чемпионаты һәм беренселегендә Ренат Бәҙертдинов районыбыҙ йөҙөн яҡлап, донъя чемпионы исемен яуланы.