Һайлау участоктары эш башланы

Тауыш биреү өс көн дауам итә. Һайлау участоктары иртәнге сәғәт 8.00ҙән 20.00 сәғәткә ҡәҙәр эшләйәсәк. Уларҙа һайлауҙарҙың асыҡлығын һәм дөрөҫлөгөн кандидаттар, сәйәси партиялар һәм Йәмәғәтселек палатаһы тарафынан билдәләнгән күҙәтеүселәр тәьмин итәсәк.
Тауыш биреүҙең тәүге көнө булған 6 сентябрь иртәһендә райондың бөтә 43 һайлау участогы ла тап иртәнге 8. 00 сәғәттә асылды.
Саҡмағоштағы Октябрҙең 70 йыллығы урамында урынлашҡан 3262-нсе һанлы һайлау участогында ла тауыш биреүҙең тәүге иртәһендә был миҙгелдәрҙә Рәсәй Федерацияһы һәм Башҡортостан Республикаһы гимндары яңғыраны. Тауыш биреү өсөн тәғәйенләнгән бина һайлауҙарҙы үткәреүгә тулыһынса әҙер. Күҙәтеүселәр өсөн урындар тәғәйенләнгән, һайлаусылар исемлеге һәм һайлау бюллетендәре тейешле тәртиптә әҙерләнгән, бинала йәшерен тауыш биреү өсөн айырым кабинкалар йыһазланған, һайлаусылар өсөн кәрәкле мәғлүмәттәр урынлаштырылған стенд булдырылған. Участок асылыр алдынан һайлау комиссияһы ағзалары күҙәтеүселәргә буш стационар һәм күсмә тартмаларҙы күрһәтеп, уларның күҙ алдында был тартмаларҙы кануниәт талаптары буйынса мөһерләнеләр.
Өс көн дауам итәсәк һайлауҙарҙа был участокта ҙур эш тәжрибәһенә эйә булған комиссия ағзалары эшләйәсәк. Улар эш башлаған тәүге минуттарҙан уҡ һайлаусылар килә башланы. Участокҡа килеүселәр "Рәхмәт" акцияһында ҡатнашып, ҡиммәтле бүләктәр отоу мөмкинлегенә лә эйә була ала.
#выбираемГлаву
#Башкортостан
#Чекмагушевскийрайон
#3262УИК