Ижади конкурстар телде өйрәнеүгә ярҙам итә

Ошо маҡсатта һуңғы йылдарҙа Башҡорт телен һаҡлау һәм үҫтереү фонды проекттарының бер өлөшө Башҡортостан Башлығы Гранттары фонды тарафынан финансланды. Ә был фонд башҡа коммерцияга ҡоролмаған берләшмәләр менән берлектә 2021-2024 йылдарҙа ғына ла 16 күләмле грантты тормошҡа ашырған. “Беҙ башҡорт теленә, уны өйрәнеүгә һәм һаҡлауға ҙур иғтибар бүләбеҙ. Һәм быны тормошҡа ашырғанда республикала йәшәүселәр ҙур роль уйнауы бик яҡшы. Беҙ үҙ телендә ихлас итеп, ҙур теләк менән һөйләшкән, уны яратҡан һәм телгә булған һөйөүҙе башҡаларға ла тапшырған, күсергән шундай әүҙем һәм битараф булмағандарҙы хупларға, уларға ярҙам итергә булдыҡ”, – тип яҙҙы үҙ социаль селтәрендә республика етәксесе Радий Фәрит улы Хәбиров. Беҙҙең Саҡмағош районында ла дәүләт теле булған башҡорт телен үҫтереүгә олы иғтибар бүленә. Район үҙәгендәге һәм ауылдарҙағы мәктәптәрҙә туған тел уҡытыусылары йәш быуынға ошо милли хәзинәне күсереү-тапшырыу маҡсатында күләмле эш алып бара. Беҙ был хаҡта Саҡмағош беренсе урта мәктәбенең башҡорт теле һәм әҙәбиәте уҡытыусыһы, район башҡорт теле уҡытыусыларының методик берләшмәһе етәксеһе, йәмәғәтселек фекере лидеры Рәмзилә Рауил ҡыҙы Исламғәлиева менән һөйләштек һәм уҡыусылары менән бергәләп ниндәй конкурс-бәйгеләрҙә ҡатнашыуҙары тураһында һораштыҡ. Сөнки Башҡорт телен һаҡлау һәм үҫтереү фонды гранттары башҡорт телен ысын күңеленән яратыусы кешеләрҙең үҙенсәлекле һәм заманса фекер-идеяларын тормышҡа ашырырға ярҙам итә. Әйткәндәй, Рәмзилә Рауил ҡыҙы үҙе лә байтаҡ төбәк-ара һөнәри бәйгеләрҙә ҡатнашып, ғорурланырлыҡ ҡаҙаныштарға ирешкән, төрлө номинацияларҙа еңеү яулаған һәм Бөтә Донъя башҡорттары ҡоролтайының махсус призына лайыҡ булған яҡташыбыҙ. Ул беҙгә уҡыусылары ирешкән уңыштар, мәктәптә улар менән алып барылған эшсәнлек тураһында болай тип һөйләне. “Башҡорт телен һаҡлау һәм үҫтереү фонды бәйгеләренә әүҙем ҡушылдым. Һуңғы өс йылда Халыҡ-ара Туған телдәр көнөнә һәм башҡорт теленә арнап, бәйгеселәр үҙҙәре ижад иткән шиғыҙар конкурсында ҡатнаштым, призлы урындар яулап килдем һәм быйыл еңеүсе булдым. Минең менән бергә уҡыусым Ярина Халиҡова ла ҡатнашты. Ул 2023 йыл ахырында был конкурста еңеүсе булды. Унан бер аҙ алдараҡ Руфина Сафина төбәк-ара конкурста үҙенең автор шигыры менән призлы урынға лайыҡ булды. Рада Ильясова Ишембай ҡалаһында үткән ижади конкурста еңеүсе булды, Ирек Дәүләтов иһә ЮНЕСКОның “Урал-батыр” эпосына арналған конкурсында эссе номинацияһында призлы урын яуланы. Азалина Хәбирова, Ярина Халиҡова һәм үҙем Башҡорт телен һаҡлау һәм үҫтереү фонды тарафынан ойошторолган бәйгеләрҙә даими ҡатнашып призлы урындарға лайыҡ булабыҙ. Өфөләге 8-нсе китапхана ойошторған төбәк-ара конкурста ҡатнашып, Ярина еңеүсе булды һәм үҙем быйыл туған телдәр көнөнә бағышланған конкурстың беренсеһендә призлы урынға лайыҡ булып, икенсеһендә еңеү яуланым. Шулай уҡ мәктәбебеҙ менән уҡыу йорттары араһында үткәрелгән “Мәктәп телевидениеһы” конкурсында ҡатнашып, бәйгегә башҡорт телендәге видеоролик әҙерләп ҡушылдыҡ. Районда үткәрелгән төрлө ижади, музыкаль бәйгеләр, әдип-ижатсыларҙың, галимдарҙың юбилейҙарына арналған тематик кисәләрҙән дә ситтә ҡалмайбыҙ, әүҙем ҡатнашабыҙ. Дөйөм алғанда, мәктәбебеҙҙә башҡорт телен һәм мәҙәниәтен-сәнғәтен үҫтереүгә ҙур иғтибар бүленә. Уҡыу йортобоҙҙың баҡсаһында сәскә түтәлдәре лә милли символ – ҡурай сәскәһе рәүешендә ултыртыла. Улар халҡыбыҙҙың төп эмблемаһын балҡытып, тирә-яҡты йәмләйҙәр. Мәктәбебеҙҙә башҡорт теле һәм әҙәбиәте дәрестәренән тыш, күп төрлө башға саралар үткәрелә, түңәрәктәр эшләй. Быйыл илебеҙҙә иғлан ителгән Ғаилә йылы булыуын да күҙ уңында тотоп, уҡыусыларыбыҙҙың ата-әсәләре ҡатнашлығында ла саралар үткәрҙек, ғомумән, улар менән даими рәүештә тығыҙ элемтәлә торабыҙ. Аҙ тәьмин ителгән ғаиләләрҙә тәрбиәләнеүсе балалар өсөн махсус түңәрәктәр эшләй, районыбыҙҙа төрлө йүнәлештәге махсус тематик саралар үткәрелеп тора”.