Хеҙмәттәре лайыҡлы баһаланды

Билдәле булыуынса, 20 октябрҙә мәктәп ашнаҡсыларының һөнәри байрамы билдәләнде. Был көндө район мәктәптәрендә тәмле, файҙалы аштары менән уҡыусыларҙың сәләмәтлеген нығытыуға үҙ хеҙмәт өлөшөн индергән ошо изгелекле һөнәр эйәләре хөрмәтләнде. Ә күп йыллыҡ хеҙмәт стажына эйә булған ике райондашыбыҙҙың хеҙмәте башҡалалағы Профсоюздар йортонда үткән тантанала айырым билдәләнде. Намыҫлы хеҙмәттәре, юғары һөнәри оҫталыҡтары һәм социаль туҡландырыуҙы ойоштороуға индергән ҙур өлөштәре өсөн Саҡмағош беренсе урта мәктәбенең өлкән ашнаҡсыһы Лилиә Мәсғүт ҡыҙы Йосопова Башҡортостан Республикаһы Сауҙа һәм хеҙмәттәр министрлығының Маҡтау грамотаһы, Яңы Ҡото ауылы мәктәбе ашнаҡсыһы Миләүшә Вил ҡыҙы Баймиева ошо уҡ министрлыҡтың Рәхмәт хаты менән бүләкләнде. Беҙ райондаштарыбыҙҙы ошо ҙур һөйөнөстәре менән ҡотлап, уларға ныҡлы сәләмәтлек, ғаилә именлеге һәм эштәрендә уңыштар теләйбеҙ.