Улар – районыбыҙ киләсәге

Осрашыу барышында студенттар өсөн “Йәштәр – яңы фекерҙәр генераторы” дип исемләнгән стратегик сессия үткәрелде. Уның дауамында егеттәр-ҡыҙҙар төркөмдәрҙә эшләп социаль яҡтан әһәмиәтле проблемаларҙы тикшерҙе. Йәш райондаштарыбыҙ уларҙы хәл итеү ыҫулдарын спорт, мәҙәниәт, йәштәр инициативаһы һәм ялы, волонтерлыҡ йүнәлештәре буйынса проекттар форматында тәҡдим итте. Егеттәребез һәм ҡыҙҙарыбыҙ әүҙем рәүештә яңы фекерҙәр тәҡдим итте, һорауҙар бирҙе, райондың ҡаҙаныштары һәм перспективалары тураһында һүҙ алып барҙы.
Улар өсөн мәҙәниәт йорто фойеһында төрлө йүнәлештәге оҫталыҡ сәғәттәре лә ойошторолдо. Уның сиктәрендә Өфө урман хужалығы техникумын тамамлаған Алһыу Черникованың еләк-емештән гөлләмәләр эшләргә өйрәтте. Өфө дәүләт икътисад һәм сервис академияһын тамамлаған Гүзәлиә Наил ҡыҙы Ғәлиева уҡыусылары менән булдырған кеймдәр коллекцияһы менән таныштырҙы, никах яулығын матур итеп бәйләргә өйрәтте. Рубик шаҡмағын йыйыу оҫталығы менән уртаҡлашҡан Башҡортостан архитектура-төҙөлөш колледжы студенты Айнур Ғүмәров эргәһенән дә кеше өҙелмәне, барыһы ла уның һөйләгәндәрен ҡыҙыҡһынып тыңланы. Мәҙәниәт йортоноң тамаша залында райондашыбыҙ, психолог Илшат Аҡсурин үткәргән “Һөҙөмтәле коммуникаторҙың 7 принцибы” дип исемләнгән оҫталыҡ сәғәте сарала ҡатнашыусыларҙың бөтәһе өсөн дә фәһемле булды.
Кафела әҙерләнгән сәй табыны артында ла йылы әңғәмәләр дауам итте. Киске сәғәттәрҙә иһә студенттар өсөн “Саҡмағош-Арена” һырғалағында боҙҙағы дискотека үткәрелде.