Туған яҡта үткән осрашыу

Был традицияға быйыл да тоғро ҡалып, Саҡмағош районының Аблай мәҙәният йортонда ауыл мәктәбен тамамлап, әлеге ваҡытта төрлө уҡыу йорттарында белем алыусы йәштәрҙең 9 сыйныф уҡыусылары менән осрашуы ойошторолды. “Донъя студенттары – һеҙ Ерҙең өмөтө” тип исемләнгән һөнәри билдәләнеш йүнәлешендәге был сараны мәҙәниәт хеҙмәткәрҙәре Л.С.Шәйәхмәтова, Г.М.Ибраһимова менән мәктәп директорының тәрбиә эшсәнлеге буйынса кәңәшсеһе Д.М.Ғүмәрова берлектә ойоштороп үткәрҙе. Кисә ихлас, дуҫтәнә мөхиттә барҙы. Сара барышында студенттар мәктәп йылдарын иҫкә алып, был йылдарҙа үҙҙәренә белем биргән уҡытыусы-оҫтаҙдарына рәхмәт һүҙҙәрен белдерҙеләр, әлеге ваҡытта үҙләштергән теге йәки был һөнәрҙе һәм уҡыу йортон һайлауға ниндәй уй-маҡсаттар этәргес булыуы тураһындағы фекерҙәре менән уртаҡлаштылар. Уҡыусыларға уларҙың беренсе сессияға нисек әҙерләнеүҙәре, имтихандар, улар белем алған факультеттар, уҡыу төркөмдәре тураһындағы мәғлүмәттәр бик ҡыҙыҡлы, файҙалы булды. Улар студент тормошо тураһында да байтаҡ яңылыҡтар белҙеләр. Буласаҡ абитуриенттар ауылдаш ҡыҙҙар-егетләргә уҡыу процессы һәм дисциплиналары, имтихандар, һөнәрҙәр тураһында үҙҙәрен ҡыҙыҡһындырған күп һанлы һорауҙар биреп, уларға тулы, аныҡ яуаптар алдылар. Артабан уҡыусылар да, студенттар да бергәләп төрлө конкурс-уйындарҙа ҡатнашып күңел астылар. Туған ауыл клубындағы был осрашыу студенттар өсөн дә, уҡыусылар өсөн дә истә ҡалырлыҡ ҡызыҡлы ла, фәһемле лә булды.