Башҡортостан нисек МХО-ға ярҙам итеү өлгөһөнә әйләнде

Был – илебеҙ төбәктәренең махсус операцияға ярҙам итеүгә бәйле эшмәкәрлеген баһалау йәһәтенән тәүге күләмле тикшереүҙәр һөҙөмтәһе. Башҡортостан әлеге рейтингта өсөнсө урынды яуланы. Быға сараларҙың комплекслы һәм системалы булыуы арҡаһында өлгәшелде, тип билдәләй эксперттар. Радий Хәбиров етәкселегендәге идара итеү командаһы эште һөҙөмтәле ойоштора алды. Асылда, республикабыҙ тәжрибәһен башҡаларға өлгө итеп ҡуялар. Ә нимәһе менән тәьҫирле булды беҙҙең эшмәкәрлек?
Фронттағыларға ярҙам итәбеҙ
«Башҡортостан үҙебеҙҙекеләрҙе ташламай» саҡырыуы күптән инде киң таралды. Фронт яугирҙәре Башҡортостандың үҙ егеттәре хаҡында хәстәрлек күреүен, һәр ваҡыт кәрәкле әйберҙәр туплап гуманитар ярҙам ебәреүен белә, ә уларҙың ғаиләләре бер нимәгә лә мохтаж түгел. Күп кенә хәрби хәбәрселәр, Башҡортостандың фронтҡа һәм яугирҙәргә ярҙамы – илдә иң яҡшыларҙың береһе, тип билдәләй.
Беҙ тәүгеләрҙән булып 2022 йылда гумконвой ебәрҙек, ә бөгөнгә уларҙың һаны 144-кә етте. Бынан тыш, бөтә республиканан предприятиелар, муниципалитеттар, битараф булмаған кешеләр алғы һыҙыҡҡа кәрәкле посылкалар ебәрә. Барлыҡ район башлыҡтары Донбассҡа барып, яҡташтарының хәл-әхүәлен белешеп тора. Башҡортостан гуманитар ярҙам ташыуҙың үҙ системаһын булдырған: ЛХР-ҙа беҙҙең логистик үҙәк эшләй, алып барылған ярҙам заявкаларға һәм ихтыяжға ярашлы бүленә.
Беҙҙең табиптар сиратлап хәрби операция биләмәһендәге һалдаттарға ла, урындағы халыҡҡа ла ярҙам итергә бара, унда хатта теш дауалау өсөн заманса стоматология модуле алып барылған. Беҙҙең ҡатын-ҡыҙҙар отрядтары МХО биләмәһендәге хәрби госпиталдәрҙә яралыларҙы ҡарарға ярҙам итә.
Тылда ла эш тынмай
Бында, тылда, МХО-ла ҡатнашыусылар һәм уларҙың ғаилә ағзалары өсөн 40-тан ашыу ярҙам сараһы булдырылған, улар иҫәбендә – шифаханаларҙа бушлай дауаланыу, балаларға белем биреү, ҡайһы бер һалымдарҙан азат итеү, көнкүреш проблемаларын хәл итеүҙә ярҙам һәм башҡалар. Бер генә хәрбиҙең дә ғаиләһе иғтибарһыҙ ҡалмаған.
Радий Хәбиров был процесты үҙе контролдә тота, ул бер нисә тапҡыр махсус хәрби операция биләмәһенә барҙы, алғы һыҙыҡта булды, яугирҙәрҙең шатлыҡ-хәсрәттәре тураһында белеү өсөн улар менән даими аралаша.
Контракт хеҙмәте
Башҡортостан контракт хеҙмәтенә ҡабул итеүҙе ойоштороу һәм халыҡ менән патриотик һәм аңлатыу эштәре алып барыу буйынса өлгө булып тора. Мобилизация әҙерлеген яҡшы ойоштороу буталсыҡҡа юл ҡуймаҫҡа ярҙам итте, ә һуңынан республикабыҙ илебеҙҙе яҡларға әҙер булыуын эш менән иҫбатланы. Республикала доброволецтар иҫәбенә хәҙер инде билдәлелек яулаған Салауат Юлаев, генерал Шайморатов һәм Александр Доставалов исемендәге башҡорт батальондары, һуңынан «Башҡортостан» мотоуҡсылар полкы ойошторолдо. Республиканан доброволецтар ағымы бөгөнгәсә туҡтамай.
Яугирҙәрҙе тыныс тормошҡа әҙерләйбеҙ
Республикала МХО-ла ҡатнашыусыларҙың тыныс тормошҡа яраҡлашыу системаһы әүҙем үҫтерелә. Был йүнәлештә «Ватанды һаҡлаусылар» фонды филиалы ҙур эш башҡара. Оборона министры урынбаҫары, дәүләт фонды рәйесе Анна Цивилева әйтеүенсә, Башҡортостанда фондтың эшен ойоштороу тәжрибәһе, атап әйткәндә, бер юлы бер нисә ҡалала ярҙам үҙәктәре асыу – үҙенсәлекле һәм һөҙөмтәле алым, шуға күрә уны башҡа төбәктәргә лә таратырға ниәтләйҙәр.
«Геройҙар ваҡыты» федераль проекты өлгөһөнә эйәреп, республикабыҙҙа «Башҡортостан геройҙары» кадрҙар программаһы эшләй башланы. Ошо программаға ярашлы МХО-ла ҡатнашыусылар араһынан төрлө кимәлдәге предприятиеларҙа, ойошмаларҙа, власть органдарында эшләү өсөн квалификациялы идарасылар әҙерләйәсәктәр. Тәүге аҙнала уҡ меңгә яҡын кеше ҡатнашырға теләк белдереп ғариза биргән. Был проекттың ихтыяжлы булыуы хаҡында һөйләй. Радий Хәбиров беренселәрҙән булып хәрби бурыстарын үтәү барышында уңыш ҡаҙанған МХО яугирҙәрен яуаплы вазифаларға тәғәйенләй башланы һәм киләсәктә лә быны эшләүен дауам итәсәген белдерҙе. Ул шәхсән үҙе программала ҡатнашыусы бер нисә егеттең остазы буласаҡ һәм уларҙы дәүләт идаралығы нескәлектәренә өйрәтәсәк. “Күптән түгел Саҡмағош районындағы “Ватанды һаҡлаусылар” дәүләт фонды филиалында Рәсәй Геройы Степан Беловтың әсәһе Тамара Витальевна Белова ҡатнашлығында махсус хәрби операция бурыстарын үтәүсе яугирҙәребеҙҙең ата-әсәләре өсөн йылы, дуҫтанә мөхиттә күркәм сара үткәрелде. Уның маҡсаты – махсус хәрби операцияла батырҙарса һәләҡ булған һәм хәбәрһеҙ юғалған яҡташтарҙың ғаилә ағзаларын психологик тернәкләндереү, көндәлек эш-мәшәҡәттәрҙән ял иттереү, борсылыу-стресстарҙан арындырыу өсөн берләшеү, аралашыу, рухи көс биреү.
Сара асыҡ диалог һәм оҫталыҡ дәрестәре форматында ойошторолдо. Ҡатын-ҡыҙҙар гүзәллек серҙәрен һәм кейеҙ баҫыу технологияһын үҙләштерһә, ир-егеттәр иһә “СВОя гостиная” клубы сиктәрендә көнүҙәк проблемалар тураһында фекер алышырға йыйылдылар. Проект “Ватанды һаҡлаусылар” фондының Башҡортостан Республикаһындағы филиалы тарафынан “Башҡорт ҡатын-ҡыҙҙары йәмғиәте” республика ижтимағи ойошмаһы менән берлектә ғәмәлғә ашырыла. Ул ата-әсәләргә психологик ярҙам күрһәтеүгә йүнәлдерелгән һәм Төбәк Башлығы гранты менән хуплана. Осрашыу ахырында сарала ҡатнашыусылар Туған яҡты өйрәнеү музейында һәм Кейеҙ үҙәгендә булдылар. Унда һәр кем үҙенә иҫтәлекле талисман – һаҡлағыс яһарға өйрәнде. Рәсәй Геройының әсәһе Тамара Витальевна Белова сараның мәртәбәле ҡунағы булды”, – ти Саҡмағош районындағы “Ватанды һаҡлаусылар” дәүләт фонды филиалы социаль координаторы Резида Зәкәриә ҡыҙы Ильясова. “Махсус хәрби операция башланғандан бирле райондаштарыбыҙҙы яугирҙәргә ярҙам күрһәтеү теләге берләштерҙе. Саҡмағоштағы М.Шайморатов исемендәге волонтерҙар штабына килеүселәр күп. Улар араһында халҡы ялдағы апайҙар ҙа байтаҡ. Улар өсөн “Үҙебеҙҙекеләрҙе ташламайбыҙ!” һүҙ теҙмәһе ябай һүҙҙәр генә түгел, был ғибәрә артында күптәрҙең тырыш хеҙмәте, волонтерҙарҙың даими эшсәнлеге ята.
Өлкән йәштәге изге күңелле көмөш волонтерҙар берҙәм команда булып еңеүҙе яҡынайтыуға ҡулдарынан килгәнсә өлөш индерәләр, махсус хәрби операция бурыстарын үтәүсе яҡташтарыбыҙ өсөн маскировкалау селтәрҙәре үрәләр.
Бының менән генә сикләнеп ҡалмай, Ватаныбыҙ именлеге һағында торған хәрбиҙәр өсөн йылы ойоҡбаштар, биәләйҙәр һәм башҡа кейемдәр бәйләп, яуҙа кәрәкле әйберҙәр – йылы билбауҙар һәм тепловизорҙан һаҡлаусы плащтар тегеп килтерәләр. Был плащтар яугирҙәрҙе насар һауа торошонан һаҡлап ҡына ҡалмай, уларҙы дроннар өсөн күренмәй торған да итә. “Яугирҙәр өсөн ярҙамыбыҙ бик мөһим. Уларға ярҙам итеп, беҙ Еңеүҙе яҡынайтабыҙ – һәр ҡайһыбыҙ үҙ урынында, үҙ постында. Был – беҙҙең фронт”, – ти апайҙар.
Беҙҙең штабта берҙәм тырышлыҡ менән был изге ҡатнашыусы бөтә ҡатын-ҡыҙҙарға ла бик рәхмәтлебеҙ. Уларҙың һәр ҡайһы оло маҡтауҙарға һәм хөрмәткә лайыҡ”, – ти Саҡмағош Волонтерҙар штабы етәксеһе, йәмәғәт фекере лидеры Лиана Рифир ҡыҙы Хәбибуллина.