Берҙәмлектә – көс!

Иҫәнбай ауыл Советы ауыл биләмәһе өс ауылды берләштереп, унда барлығы 360 хужалыҡ иҫәпләнә. Бында уларҙың тормошон яҡшыртыуға йүнәлдерелгән ҙур сығымлы эштәр башҡарыла, төрлө проекттар тормошҡа ашырыла. Әйтергә кәрәк, биләмә халҡы ағымдағы йылда ла Урындағы инициативаларҙы яҡлау программаһын хуплап ҡаршы алды:урамдарҙы ҡышын – ҡарҙан, йәйен сүптән арындырыу ҡыйынлыҡтар тыуҙыра ине. Шуға күрә биләмә халҡы «МТЗ-82.1» тракторын һатып алыуҙы ҡулай күрҙе. Был маҡсатта ауыл халҡынан 100 мең һум, иғәнәселәрҙән («Илеш МТС» йәмғиәте – 50, «Урожай» тоҡомсолоҡ заводы йәмғиәте -30, И.Ихсанов крәҫтиән - фермер хужалығы – 20 мең һум) 100 мең аҡса йыйылһа, муниципаль район хакимиәтенән – 380 мең, республика 1 млн. һум акес бүленгән.

Бу йәһәттән, шулай уҡ районда иғлан ителгән «Айыҡ ауыл-2020» конкурсы сиктәрендә Теләкәй ауыл мәҙәниәт йортонда байрам сараһы ойошторолоп, уны Иҫәнбай ауыл Советы ауыл биләмәһе хакимиәте башлығы Фәғитйән Зарипов асты. «Был программала ҡатнашыу өсөн халыҡ менән ғөмүм йыйылыштар үткәрелде. Артабан документтар әҙерләнеп, аҡса тупланды. Иғәнәселәр «Илеш МТС», «Урожай» тоҡомсолоҡ заводы йәмғиәттәренә, И.Ихсанов крәҫтиән-фермер хужалыҡтарына, ғөмүмән, әлеге проектты тормошҡа ашырырға ярҙам иткән барлыҡ ауыл халҡына ҙур рәхмәтлемен. Киләсәктә лә берҙәм булырбыҙ, тип ышанам», – тине ул сығышында.

Ауыл халҡы исеменән яугир-интернационалист Ғилемйән Биктимеров Хөкүмәткә, муниципаль район, ауыл советы ауыл биләмәһе хакимиәттәренә ҙур рәхмәтен еткерҙе. Ошо төбәктә тыуып-үҫкән, Үрге Йәркәйҙә йәшәүсе бер нисә китап авторы Радик Зиязов үҙенең шиғырҙарын уҡып ишеттерҙе.

Сара йыр-моң менән үрелеп барҙы. Илмира Хәйретдинованың, Анастасия һәм Кристина Ғәйфуллиналарҙың, Алһыу Фаҙлыеваның үҙенсәлекле тауыштары, Денис Хәйретдиновның сәнғәтле шиғыр уҡыуы, Нурия Мостафинаның бейеүе һәр кемде әсир итте.