Һәйкәлдәрҙә халыҡ хәтере

Ҡарабаш ауыл советы ауыл биләмәһенә ҡараған Яңы Күктау һәм Иштирәк ауылдарынан күпме йәшнәп торған ир-егеттәр һуғыш яландарында ятып ҡалған, күпме сәскә кеүек ҡыҙҙар баҫыуҙарҙа ирҙәр ҙә күтәрә алмаҫтай йөктө үҙ иңдәрендә тартҡан... Ике ауылдан дәһшәтле яуға 456 кеше китеп, бары 203 ир-егет кенә иҫән-һау әйләнеп ҡайтыу бәхетенә ирешһә, 253-ө мәңгелеккә баштарын һалған. Бөгөн инде бында ни бары бер һуғыш һәм ун дүрт тыл ветераны ғүмер кисерә.