Улар һәр саҡ еңеүгә ынтыла

Үткән шәмбе спорт сараларына айырыуса бай булды. “Саҡмағош-Арена” өҫтө ябыулы боҙ һырғалағында тамашасылар өҙөлөп торманы. Был көндө улар ябай булмаған уйын – “Башкирские пираты” следж-хоккей клубы спортсылары ҡатнашлығындағы матчты ҙур иғтибар менән күҙәтте.

Был уйын “Следж райондарға бара!” социаль проекты һәм Башҡортостан Башлығы Р.Ф.Хәбиров грантын бойомға ашырыу барышы сиктәрендә үтте. Әлеге проект ошо спорт төрөнең реабилитация мөмкинлектәрен күрһәтеү һәм сәләмәтлеге торошо буйынса мөмкинлектәре сикле булған граждандарҙы спортка йәлеп итеү маҡсаты менән ойошторолдо.