Фатирлы булды

Башҡортостандың төп байрамын билдәләгәндән һуң күп тә үтмәне, Иҫке Ғүмәр ауылында йәшәүсе Ғәниевтар ғаиләһендә тағын

бер шатлыҡлы ваҡиға булды. Булат Ғәниевҡа дөйөм майҙаны 41,2 квадрат метрлы фатир асҡысы тапшырылды.

– Ағымдағы йылда беҙҙең район бюджетына беренсе тапҡыр инвалидты торлак менән тәьмин итеү өсөн 950600 мең һум субвенция күсерелде. Ул 2005 йылдың 1 ғинуарынан һуң торлаҡҡа мохтаж булараҡ иҫәпкә баҫҡан һәм хроник сирҙең ауыр формаһынан интеккән инвалидтарҙы социаль килешеү буйынса фатир менән тәьмин итеүгә тәғәйенләнә, – тине асҡыс тапшырыу тантанаһында муниципаль район хакимиәтенең социаль-торлаҡ программаларын һәм ер мәсьәләләрен ғәмәлгә ашырыу буйынса баш белгесе Ләйсән Нәширбанова.

– Етем һәм ата-әсә тәрбиәһенән мәхрүм ҡалған балаларҙы, шулай уҡ инвалидтарҙы торлаҡ менән тәьмин итеү – Башҡортостан Республикаһы Хөкүмәте һәм район хакимимәтенең өҫтөнлөклө эшсәнлек йүнәлештәренән һанала. Шуға ла һеҙгә фатир асҡысы тапшырыуға беҙ ҙә һөйөнәбеҙ. Ауырымағыҙ, оҙаҡ йәшәгеҙ, – тине район хакимиәте башлығы Руслан Ғизәтуллин осрашыуҙы йомғаҡлап.

Ғаиләләренә күрһәткән ярҙам өсөн рәхмәт белдергәндә Булаттың әсәһе күҙ йәштәрен тыя алманы.

– Улым менән күп ауырлыҡтар аша үттек. Бөгөн улар артта тороп ҡалған кеүек тойола. Ерҙә беҙҙән дә бәхетлерәк кеше юҡтыр төҫлө. Барсағыҙға ихлас рәхмәт, – тине ул.