Ғаиләм – тормошом нигеҙе

Аһ, йөрәктәргә ҡан һауғыҙрған, әсе ҡайғы һалған, ҡалаларҙы, ауылдарҙы янғын уттары менән көйҙөргән ҡотосҡос дәһшәтле һуғыш йылдарында ниҙәр генә күрмәгән Ватан бәйһеҙлеге өсөн көрәшеүселәр, итәк тулы бала менән тылда ҡалған ҡатын-ҡыҙҙар, һуғыш йылы балалары!

Әрнеүле күҙ йәштәре йылдар ҡатламы аҫтында бик тәрәнгә йәшенһә лә, ул көндәрҙең ауырлығы йөрәк түрендә мәңге һаҡланасаҡ.

Һуғыш йылдары балаһы Римдең атаһы Мирзаян Хәйретдинов халыҡ өсөн ҙур фажиғалы Беренсе Бөтә донъя һуышында ун һигеҙ йәше тулыр-тулмаҫ ҡатнашҡан була. Һуғыш яралары төҙелеп тә бөтмәй, Бөйөк Ватан һуғышына сакырыу килә. Ҡатыны Мәрүиә дүрт балаһы менән аслыҡта-яланғаслыҡта ҡала. Мирзаяндың туғаны, минең ҡәйнәм Шәмсигөл менән бер-береһенә ярҙам итеп, утлы һуғыш йылдарын иҫән-имен кисерәләр. Бөйөк Еңеү таңы! Мирзаян ауылға 1946 йылда ҡайта. Римде 1948 йылда мәктәпкә бирәләр.