Иң көслөләр алышта асыҡланды

Район үҙәгендә билбау көрәше буйынса мәртәбәле бәйге үтте

Быға, әлбиттә, “Спорт көрәшен – мәктәптәргә” пилот проекты ла булышлыҡ итте. Беҙҙең Саҡмағош районында ла был спорт төрөн үҙ итеүселәр йылдан-йыл арта бара. Күптән түгел район үҙәгендәге Балалар-үсмерҙәр спорт мәктәбендә ир-егеттәр һәм ҡатын-ҡыҙҙар араһында был төр көрәш буйынса Башҡортостан Республикаһының асыҡ Чемпионаты үтте.
Мәртәбәле спорт сараһын асыу тантанаһында Халыҡ-ара Билбау көрәше Федерацияһының спорт директоры В.К.Ғайнуллин, БР Билбау көрәше Федерацияһы президенты И.Р.Шәрипов, райондашыбыҙ, Рәсәйҙең атҡаҙанған тренеры, Бөтә Рәсәй Билбау көрәше федерацияһы вице-президенты Р.И.Зыяҡаев ҡатнашты. Турнирҙа еңеп сыҡҡан иң көслө спортсылар май айы ахырында Мордовия Республикаһында үтәсәк Рәсәй Чемпионатында ҡатнашыу хоҡуҡына эйә була.
Еңеү өсөн көсөргәнешле алышты республиканың 18 ҡала һәм районынан килгән көрәшселәр алып барҙы. Ярыш һөҙөмтәләре буйынса был Чемпионатта республиканың һәм, әлбиттә, туған Саҡмағош районының данын яҡташыбыҙ – спорт мастерлығына кандидат Артур Зарипов яҡлаясаҡ. Уның ил күлмендәге бәйгелә да уңышҡа ирешеүен теләйбеҙ.
Был сара менән беррәттән ошо көндө 2011-2013 йылдарҙа тыуған үҫмер егеттәр һәм ҡыҙҙар араһында ике тапҡыр Советтар Союзы Геройы Муса Гәрәев истәлегенә арналған билбау көрәше буйынса асыҡ турнир үтте. Был бәйгене ойоштороуға спорттың ошо төрөн үҙ итеүсе яҡташтарыбыҙ И.Имаметдинов, В.Еникеев ҙур тырышлыҡ һалып, үҙҙәре үк иғәнәселәр ҙә булды. Унда Өфө, Белорет ҡалалары, Асҡын, Илеш, Краснокама, Тәтешле, Саҡмағош, Шаран райондары вәкилдәре булған йәш спортсылар көс һынаны. Йәш райондаштарыбыҙ унда уңышлы сығыш яһап, еңеүселәр пьедесталының бөтә басҡыстарына ла күтәрелде. Командалар араһындағы беренселектә уларға тиңләшә алыусылар булманы.